ភ្នំពេញ៖ សាលា Golden Gate American School Phnom Penh Thmey Campus បានបើកសម្ភោធជាផ្លូវការហើយ បន្ទាប់ពីបានបើកដំណើរការកាលពី ២០១៩។

ដោយសារតែ Covid19 សាលាGolden Gate បានបើកសាខារបស់ពួកគេ ប៉ុន្តែមិនទាន់បានសម្ពោធនោះទេរហូតដល់ថ្ងៃទី២៥ ខែតុលា។

ពិធីនេះបានចាប់ផ្តើមដោយការរាំរបាំប្រពៃណីរបស់សិស្សសាលា បន្ទាប់មកអគ្គនាយិកាសាលាលោកស្រី ហេង សុគន្ធា បានថ្លែងសុន្ទរកថាបើកដោយបានថ្លែងអំណរគុណដល់អ្នកចូលរួមទាំងអស់ សិស្សានុសិស្ស មាតាបិតា លោកគ្រូ អ្នកគ្រូ គ្រប់ភាគីពាក់ព័ន្ធដែលបានចូលរួមក្នុងពិធីសម្ពោធនាថ្ងៃនេះ រួមទាំងអរគុណដល់នាយករដ្ឋមន្ត្រីសម្តេចតេជោ ហ៊ុន សែន ផងដែរ។

សាលា Golden Gate American School ត្រូវបានបង្កើតឡើងក្នុងឆ្នាំ១៩៩៦ ដែលផ្តល់ការបង្រៀនថ្នាក់មត្តេយ្យជាភាសាអង់គ្លេស ថៃ ជប៉ុន ចិន ជំនាញកុំព្យូទ័រ និងវគ្គខ្លីៗជាច្រើនដូចជា ទីផ្សារ រដ្ឋបាល ការគ្រប់គ្រងទូទៅ និងគណនេយ្យ។

ក្នុងឆ្នាំ ២០០៩-២០១០ សាលាបានបើកបង្រៀនចំណេះទូទៅភាសាខ្មែរ អង់គ្លេស និងចិន សម្រាប់ថ្នាក់ឧត្តមសិក្សា។ កិច្ចខិតខំប្រឹងប្រែងរបស់បុគ្គលិកសិក្សា និងគ្រូបង្រៀនដែលមានប្រវត្តិអប់រំរឹងមាំ និងកម្មវិធីសិក្សាត្រូវនឹងកម្មវិធីសិក្សារបស់ក្រសួងអប់រំ យុវជន និងកីឡា។

សិស្សនឹងទទួលបានវិញ្ញាបនបត្រពីរ ដោយ ១ទទួលបានពីនាយកដ្ឋានអប់រំ យុវជន និងកីឡា និងមួយទៀតពីសាលានៅសហរដ្ឋអាមេរិក។ សញ្ញាបត្រមធ្យមសិក្សាទុតិយភូមិជាតិដែលផ្តល់ដោយក្រសួងអប់រំ យុវជន និងកីឡា និងវិញ្ញាបនបត្រថ្នាក់ទី១២ ដែលចេញដោយសាលា Golden Gate American School គឺមានតម្លៃសមមូល។

សិស្ស ២០នាក់បានបញ្ចប់ថ្នាក់ទី១២ ជាភាសាខ្មែរក្នុងឆ្នាំសិក្សា២០២០-២០២១ ហើយម្នាក់ក្នុងចំណោមពួកគេទទួលបាននិទ្ទេស A ។

សិស្សចំនួន ៣៩នាក់បានចូលរួមប្រកួតប្រជែងក្នុងកម្មវិធី Copernicus Olympiad ដែលជាការប្រកួតអន្តរជាតិសម្រាប់ចំណេះដឹងទូទៅផ្នែកវិទ្យាសាស្ត្រ រូបវិទ្យា និងតារាសាស្ត្រ នៅរដ្ឋតិចសាស់ សហរដ្ឋអាមេរិក ក្នុងខែមករា ឆ្នាំ២០២២។ ជាលទ្ធផល សិស្សានុសិស្សដណ្តើមបានមេដាយសរុបចំនួន ៣៦ រួមមានមាស ៧ ប្រាក់ ១០ និងសំរឹទ្ធ ១៩។

នៅក្នុងការប្រកួត Teenagle Competition សាលាបានរៀបចំក្រុមសិស្សចំនួន ៣៩នាក់ (ស្រី ១៥នាក់) ដើម្បីប្រកួតប្រជែងនៅទីក្រុងឡុងដ៍ក្នុងខែកក្កដា ឆ្នាំ២០២២។ សិស្សទទួលបានមេដាយមាសចំនួន៣ ប្រាក់៧ មេដាយសំរឹទ្ធចំនួន៥ មេដាយកិត្តិយសចំនួន២០ និងវិញ្ញាបនបត្រចំនួន២។

EAC News បានសម្ភាសអ្នកគ្រប់គ្រងទីផ្សារ John Turman ។ គាត់បាននិយាយអំពីកម្មវិធីសិក្សា និងថាតើពួកគេមានមោទនភាពយ៉ាងណាជាមួយសិស្សរបស់ពួកគេដែលបានចូលរៀន Teeneagle ។

ប្រធានផ្នែកទីផ្សារលោក John Turman បាននិយាយថា៖ «យើងមានកម្មវិធីភាសាចំនួនបីដែលមាននៅទីនេះ យើងមានកម្មវិធីចិន កម្មវិធីខ្មែរ និងកម្មវិធីភាសាអង់គ្លេស ហើយនៅក្នុងកម្មវិធីភាសាអង់គ្លេសរបស់យើង យើងមានកម្មវិធីសិក្សារបស់អាមេរិកដែលគ្របដណ្តប់លើមុខវិជ្ជាស្តង់ដារទាំងអស់ដែលត្រូវបានសិក្សានៅក្នុងសាលាអាមេរិកាំង»។

លោកបន្ថែម៖ «នេះគឺជាកម្មវិធីសិក្សារបស់អាមេរិកទាំងស្រុង ពួកយើងគ្របដណ្តប់លើមុខវិជ្ជាទាំងអស់ដូចជា គណិតវិទ្យា វិទ្យាសាស្ត្រ ហើយយើងមានមន្ទីរពិសោធន៍វិទ្យាសាស្ត្រថ្មីនៅក្នុងបរិវេណសាលាថ្មីរបស់យើងនៅទីនេះ។ យើងគ្របដណ្តប់សិល្បៈ យើងមានកម្មវិធីសិល្បៈដ៏អស្ចារ្យ យើងមានថ្នាក់តន្ត្រីដែលអាចប្រើបានផងដែរ មនុស្សជាតិ»។

«វាពិតជាអស្ចារ្យណាស់ ដែលពួកយើងចង់ឃើញសិស្សរបស់យើងបានចេញទៅប្រកួតប្រជែង ហើយពួកគេធ្វើការងារដ៏អស្ចារ្យ ពួកគេធ្វើបានយ៉ាងអស្ចារ្យ ហើយយើងពិតជារំភើបចំពោះវា»។

ក្នុងពេលដែលរំភើបរីករាយនេះលោក John Turman ក៏បានប្រកាសដែរថា សាលានឹងបើកសាខាថ្មីដែលមានផ្ទៃដីទំហំ ៥ហិកតានៅផ្លូវសម្តេចតេជោ ហ៊ុន សែន (ផ្លូវ ៦០ម៉ែត្រ)។

«ពួកគេបានប្រកាសថាមានរឿងដ៏គួរឱ្យរំភើបមួយទៀតកើតឡើងនៅថ្ងៃនេះ ពួកគេបានប្រកាសពីការបើកសាខាថ្មី»។

សាលាក៏បានការបង្កើត «មូលនិធិហ្គោលឌិនហ្គេត» ដោយបានរៀបចំកម្មវិធីផ្សេងៗជាច្រើនមានដូចជាកម្មវិធី ទិវាគ្រួសារ កម្មវិធីប្រកួតបាល់ទាត់មិត្តភាព កម្មវិធីពិព័ណ៌ម្ហូបអាហារ។ល។ ដើម្បីប្រមូលថវិកាសម្រាប់ទិញសម្ភារសិក្សាយកទៅចែកជូនដល់សិស្សានុសិស្ស នឹងសាលារៀននៅតាមតំបន់ជនបទដែលជួបការលំបាក ជាក់ស្តែងកាលពីថ្ងៃទី២០-២១ ខែកក្កដា ឆ្នាំ២០២២ សាលាបាននាំយកសម្ភារសិក្សាទៅចែកជូនដល់ប្អូនៗសិស្សានុសិស្សចំនួន ៤សាលាស្ថិតនៅក្នុងឃុំទំរីង និងឃុំមានរិទ្ធិ ស្រុកសណ្តាន់ ខេត្តកំពង់ធំ ដែលមានសិស្សានុសិស្សសរុបចំនួន ៨១៨នាក់៕